Katholische Landeskirche von Graubünden

Scolaziun

Catecheta u catechet en uffizi accessoric

Scolaziun da basa per il stgalim primar

La professiun da la catecheta u dal catechet pretenda ina scolaziun teologica e pedagogic-religiusa qualifitgada. En ina scolaziun da dus onns (resp. da trais onns cun la basa teologic-biblica dal curs da cardientscha) s'acquistan las dunnas ed ils umens la savida ch'i dovra per lavurar sco scolastas u scolasts da religiun en la scola primara.
Suenter ina scolaziun terminada cun success obtegnan las participantas ed ils participants dal curs in certificat da la Baselgia catolica dal chantun Grischun e l'incumbensa sacrala.

Perfecziunament per il stgalim superiur

Per pudair instruir religiun en il stgalim superiur sto la catecheta u il catechet avair absolvì la scolaziun da basa per il stgalim primar ed avair rimnà experientschas professiunalas. Ultra da quai vegn pretendida ina qualificaziun supplementara obtegnida suenter in perfecziunament correspundent.

Gruppa en mira

Dunnas ed umens (cun u senza furmaziun pedagogica preliminara) che han plaschair d'accumpagnar uffants e giuvenils sin lur via da cardientscha.

Premissas

  • ina scolaziun pedagogica u ina furmaziun professiunala cun experientscha professiunala
  • il curs davart la teologia catolica "La cardientscha ozendi", 1. part: Chapir la Bibla, 2. part: Chapir Dieu ed il mund
  • plaschair ed in bun sensori co ir enturn cun uffants, giuvenils e creschids
  • ina relaziun averta ed engaschada cun la Baselgia ed il cumin-baselgia
  • l'abilitad da communitgar e da supportar squitsch psichic e fisic
Avais Vus interess? Giavischais Vus dapli infurmaziuns? Alura empustai ils documents u vegni sperasvi.
* Curs "Chapir la Bibla" a Cuira
a partir dals 28 d'october 2010 fin il zercladur 2011, mintgamai la gievgia da las 19.00 - 21.00

Curs per il stgalim superiur

» Curs da catechesa per il stgalim superiur ( )

Il nov sistem da scolaziun ForModula

ForModula - for il Grischun

ForModula è il nov sistem da scolaziun per scolastas e scolasts da religiun e per assistentas ed assistents da giuvenils, il qual vegn introducì da nov en ils chantuns da la Svizra tudestga. Questa midada suttastritga la professiunalisaziun adina pli gronda da questas vias da scolaziun, sco era la collavuraziun intensivada tranter ils differents posts spezialisads chantunals e las instituziuns ecclesiasticas.
Il sistem ForModula, ch'è vegnì lantschà l'onn 2009, è vegnì confermà da la Conferenza dals uvestgs svizzers (SBK). Uschia hai num en la communicaziun da pressa da la SBK dals 7 da december 2006: "La Conferenza dals uvestgs svizzers è sa decidida … d'introducir il sistem da scolaziun modularisà "ForModula". A maun da prescripziuns liantas duai la scolaziun catechetica en tut la Svizra vegnir unifitgada e dividida en moduls."

Finamiras

ForModula pussibilitescha ...
  • da far pli flexibel, transparent e permeabel il sistem da scolaziun ecclesiastic
  • da meglierar la renconuschientscha vicendaivla da qualificaziuns, perquai che las cumpetenzas daventan pli cumparegliablas
  • che singuls moduls stattan er a disposiziun a catechetas e catechets che han terminà lur scolaziun e che vulan sa perfecziunar
  • a catechetas e catechets futurs dad esser conscients da las pretaisas da la professiun en mira e da s'acquistar intenziunadamain las cumpetenzas mancantas

Moduls e durada

Il sistem ForModula è dividì en moduls obligatorics, moduls opziunals obligatorics e moduls opziunals. La scolaziun modularisada po uschia satisfar meglier als basegns da scolaziun da las participantas e dals participants da curs. L'entira via a la catecheta resp. al catechet en uffizi accessoric vegn però er ad esser in pau pli cumplexa ch'il curs da fin ussa. In modul cumpiglia en total 80 fin 180 uras temp d'emprender. Cumprendids èn sper ils dis da curs er il studi autodidactic e la lavur da project. Mintga catecheta e mintga catechet sto frequentar otg moduls obligatorics e dus moduls opziunals obligatorics. Tscherts temas sco p.ex. la liturgia u la catechesa dals sacraments pon uschia vegnir approfundads.                                                          
La durada da la scolaziun, dus fin quatter onns, dependa da la purschida da moduls e da l'intensitad da la scolaziun.

L'emprim curs catechetic tenor il sistem ForModula organisescha il Center catechetic dal Grischun l'atun 2011. Las absolventas ed ils absolvents da quel vegnan per gronda part ad avair scola il venderdi. Intgins moduls vegnan offerts en furma da blocs da curs da plirs dis. Indicaziuns pli detagliadas davart ils agens curs stattan a disposiziun a partir da l'entschatta da schaner 2011. Per pudair far il curs catechetic èsi necessari d'avair absolvì ils curs da la teologia catolica "Chapir la Bibla" (modul 03) e "Chapir Dieu ed il mund" (modul 04).

Dapli infurmaziuns ed ina survista dals moduls offerts dad auters posts spezialisads chattais Vus sin ForModula.

Gruppa en mira

La purschida da curs dal Center catechetic sa drizza en emprima lingia a dunnas ed umens catolics dal chantun Grischun che lavuran en nossa regiun gia sco catechetas u catechets u che vulan far quai en l'avegnir. Nus tschertgain dunnas ed umens che han gugent contact cun uffants e giuvenils, ch'als raquintan dal messadi liberant da nossa cardientscha e che vulan lavurar en ina pravenda. En cas da plazs libers pon era s'annunziar autras persunas interessadas.

Premissas

  • enconuschientschas suffizientas dal tudestg a bucca ed en scrit
  • la vegliadetgna minimala è 20 onns
  • ina furmaziun professiunala terminada u experientschas equivalentas
  • interess per il mund dals uffants e giuvenils
  • ina relaziun averta ed engaschada cun la Baselgia e la pravenda
  • la capacitad da supportar squitsch psichic e fisic
Eventualas ulteriuras premissas (p.ex. moduls gia frequentads) èn inditgadas sut ils singuls curs.

Survista

Scolaziun modularisada a la catecheta / al catechet

Moduls obligatorics

Modul 02 Pedagogia da religiun e didactica (100)
Modul 03 Princips da la teologica biblica "Chapir la Bibla" (180) prospect
Modul 04 Princips da l'existenza cristiana "Chapir Dieu ed il mund" (180) prospect
Modul 14 Concepziun liturgica (100)
Modul 15 Concepir process spirituals (80)
Modul 24 La lavur catechetica cun persunas creschidas (75)
Modul 35 Viver e lavurar en la Baselgia (100)
Modul 36 Examen final (80)

Moduls opziunals obligatorics

Modul 06 Catechesa stgalim bass (120)
Modul 08 Catechesa stgalim mesaun (120)
Modul 10 Catechesa stgalim superiur (120)
Modul 18 La via al sacrament: la reconciliaziun (80)
Modul 19 La via al sacrament: l'eucaristia (80)
Modul 20 La via al sacrament: la craisma (80)

Las cifras en parantesa inditgeschan il temp d'emprender per modul

Impurtant: ils moduls 03 e 04 pon gia vegnir frequentads e terminads ordavant.