Katholische Landeskirche von Graubünden

La lavur da giuventetgna en il Grischun

La lavur ecclesiastica da giuventetgna vegn realisada en la gronda part dals cumins-baselgia grischuns surtut en furma da lavur da ministrants. En intgins cumins-baselgia pli gronds datti persunas che lavuran en spezial per la lavur da giuventetgna ecclesiastica. Per il solit èn lur pensums però fitg pitschens (max. 20%), danor a Cuira, nua che quel post cumpiglia ina plazza da 100%.

Ultra da quai organiseschan differentas pravendas champs per uffants e giuvenils. Ils manaders da quests champs fan lur lavur per gronda part en uffizi d'onur.

La lavur d'uniun a favur dals giuvenils vegn fatga en il Grischun en quatter lieus. A Glion datti ina riga verda, a Domat ina riga verda ed ina riga blaua, a Cuira ina jubla ed ina partiziun catolica dals battasendas ed a Landquart medemamain ina jubla.

En blers lieus vegn la lavur da giuventetgna adina pli savens fatga en collavuraziun cun la vischnanca politica. Ils cumins-baselgia fan per il solit part d'ina cumissiun da gestiun e sustegnan finanzialmain la lavur da giuventetgna.

Dapi il 2005 datti en il Grischun la Federaziun tetgala da la lavur da giuventetgna che s'engascha era per la lavur da giuventetgna ecclesiastica. Il post spezialisà jugend.gr, che vegn organisà da quella federaziun, collavura stretgamain cun il Post per la lavur da giuventetgna ecclesiastica. Uschia pon blers lieus profitar da sinergias. A medem temp collavura er il post spezialisà per la lavur da giuventetgna ecclesiastica da la Baselgia evangelica refurmada dal Grischun stretgamain cun il Post per la lavur da giuventetgna ecclesiastica da la Baselgia catolica dal chantun Grischun.

Ulteriuras infurmaziuns chattais Vus sut www.jugend.gr en la rubrica "Lavur da giuventetgna en il Grischun".

» www.jugend.gr